Қазақстандық теннисші Елена Рыбакина Париждегі Олимпиада ойындарына қатысудан бас тартқаннан кейін қай турнирге баратыны айтылды, деп хабарлайды “Екінші Тайм”.
Tennis.com ақпараты бойынша, Рыбакина тамызда Канададағы турнирге қатысады.
“Рыбакина 2024 жылы сырқатына байланысты бірнеше турнирге қатыса алмады. Олимпиададан бөлек, Индиан-Уэллс, Рим және Истборнда солай болды. 25 жастағы теннисші соңғы рет Уимблдонда өнер көрсетіп, жартылай финалда болашақ чемпион Барбора Крейчиковадан жеңілген. Енді ол Солтүстік Америкадағы хард корттарына ауысады, 6 тамызда Торонтода басталатын National Bank Open турниріне қатысады”, – делінген басылым хабарламасында.
Еске салайық, кеше қазақстандық теннисші Елена Рыбакина сырқаттанып қалуына байланысты Олимпиадаға қатыспайтыны хабарланған болатын.
One Response